Kinyarwanda
English
Hakurikijwe amabwiriza yo kwirinda ikwirakwira rya COVID-19, kuri uyu wa Gatatu tariki ya 11 Ugushyingo abamotari bakorera mu Karere ka Nyarugenge baganirijwe ku ruhare rwabo mu guhagarika ikwirakwira ry'icyorezo cya COVID-19, Kurwanya impanuka zo mu muhanda no kurwanya ibyaha muri rusange. Aba bamotari banaganirijwe ku ruhare rwabo mu iterambere ry'igihugu n'uko nabo bakwiteza imbere.
Ibiganiro byabereye muri sitade ya Kigali i Nyamirambo. Ku ruhande rwa Polisi y'u Rwanda ikiganiro cyatanzwe n'ushinzwe uburere mboneragihugu no guhuza ibikorwa bya Polisi n'abaturage mu Karere ka Nyarugenge (DPCEO), Inspector of Police (IP) Schadrack Munyakazi, Akarere ka Nyarugenge hari umuyobozi w'imirimo rusange, Musafiri Leonidas, ku ruhande rw'abamotari hari umuyobozi w'abamotari ku rwego rw'igihugu, Ngarambe Daniel.
Mu kiganiro cya IP Munyakazi yibukije abamotari ko bafite uruhare rukomeye mu kubungabunga umutekano w'igihugu bitewe n'uko akenshi usanga hari bamwe mu bamotari bifashishwa mu gukora ibyaha.
Yagize ati “Bamwe muri mwe usanga mwifashishwa n'abakora ibyaha, hari ababijyamo mubizi hakaba n'ababikoreshwa batabizi. Mwirinde kujya mutwara ibiyobyabwenge cyangwa kubikoresha mu bundi buryo, mujye mushishoza ku bagenzi mutwara kuko bamwe muri bo baba ari abanyabyaha."
IP Munyakazi yakomeje agaragaza ko hari bamwe mu bamotari bajya bavugwaho gushikuza abagenzi amasakoshi yabo, kwanga kugarurira abagenzi amafaranga yabo n'ibindi bitandukanye. Yasabye aba bamotari ko buri wese aba ijisho rya mugenzi we, bakihutira gutanga amakuru hakiri kare mu rwego rwo gukumira icyaha kitaraba.
Yabibukije kandi gukomeza kubahiriza amategeko n’amabwiriza bigenga umuhanda, birinda impanuka n’ikindi cyose cyayiteza cyane cyane muri ibi bihe by’imvura turimo.
Ati "Ubuzima bwanyu n'ubw'abandi bakoresha umuhanda ni ingenzi. Bamwe muri mwe mukunze kurangwa n'imyitwarire itari myiza yateza impanuka hari abagenda barangaye, kugenda muvugira kuri telefoni cyangwa mwumva radiyo, kudaha uburenganzira abanyamaguru cyane cyane abambuka umuhanda n'ibindi bitandukanye. Iyo myifatire akenshi iteza impanuka zo mu muhanda."
Abamotari banaganirijwe ku ruhare rwabo ku kwirinda icyorezo cya COVID-19 bakanabifashamo abagenzi batwara.
Ngarambe Daniel, umuyobozi w'impuzamashyirahamwe y'abamotari mu Rwanda yibukije abamotari ko bafite uruhare rukomeye mu kurwanya ikwirakwira ry'icyorezo cya COVID-19. Yabasabye gufatanya n'izindi nzego z'igihugu mu rugamba rwo kurwanya iki cyorezo.
Yagize ati “Mu kazi kanyu ka buri munsi mujye mwubahiriza amabwiriza mwahawe ubwo mwakomorerwaga mugasubira mu kazi. Niba umugenzi aguteze banza utere umuti (Sanitizer) kuri ya ngofero umugenzi yambara kandi nawe uwumusuke mu ntoki awukarabe, bwira umugenzi yambare agatambaro mu mutwe mbere yo kwambara ingofero yabugenewe.”
Ngarambe yakomeje akangurira abamotari kwirinda kwakira amafaranga mu ntoki abashishikariza gukoresha ikoranabuhanga. Yabasabye kurangwa n'isuku aho bari hose haba ku mubiri ndetse no kuri za moto zabo. Muri ibi biganiro habaye igikorwa cyo gushyira ku ngofero z'abamotari utwapa (Stickers) twanditseho ubutumwa bwibutsa abagenzi kwirinda COVID-19.
Muri ibi biganiro umushyitsi mukuru yari umuyobozi ushinzwe imirimo rusange mu Karere ka Nyarugenge, Musafiri Leonidas. Yakanguriye abamotari kwitabira ibikorwa bya Leta igenera abaturage ndetse no kumvira impanuro bahabwa n'abayobozi.
Ati “Leta igenda igira gahunda zitandukanye zigamije kuzamura imibereho myiza y'abaturage, twavuga nk'ubwisungane mu buzima, gahunda ya Ejo heza, kuboneza imirire, gahunda zijyanye n'ibyiciro by'ubudehe n'ibindi bitandukanye. Turabasaba kujya mwitabira izi gahunda kandi namwe mufashe abaturage kuzumva.”
Mu bamotari bagera ku bihumbi 2,100 babarurirwa mu Karere ka Nyarugenge abagera ku bihumbi 2 bari bitabiriye ibiganiro. Biteganyijwe ko ibi biganiro bizakomereza no mu tundi turere tugize umujyi wa Kigali.
