Kinyarwanda
English
Abaturage bo mu midugudu 4 yo mu turere twa Nyagatare, Burera, Gicumbi n'Akarere ka Musanze nibo Polisi y'u Rwanda yahaye amashanyarazi aturuka ku mirasire y'izuba. Igikorwa cyo gushyikiriza ku mugaragaro aba baturage amashanyarazi cyabaye kuri uyu wa Gatandatu tariki ya 12 Ukuboza.
Iki gikorwa Polisi y'u Rwanda yagikoreye rimwe n'icyo gutera ibiti birimo iby'imbuto ziribwa n'amashyamba, hatewe ibiti 8200 byose biri muri gahunda yo kurengera ibidukikije. Mu Karere ka Nyagatare hatewe ibiti 4100, Akarere ka Gatsibo hatewe ibiti 3000, Rwamagana hatewe 600 naho mu Karere ka Musanze hatewe ibiti 500.
Mu Karere ka Nyagatare mu Mirenge ya Kiyombe, Matimba na Nyamiyonga nibura ingo 368 nizo zahawe amashanyarazi aturuka ku mirasire y'izuba. Ni mugihe abarenga 178 bo mu Mudugudu wa Tetero mu Kagari ka Gatovu Umurenge wa Ruhunde mu Karere ka Burera bahawe ayo mashanyarazi, naho ingo 158 zo mu midugudu ya Nyakibande na Kaniga yo mu Murenge wa Kaniga na Cyumba mu Karere ka Gicumbi nibo bahawe amashanyarazi aturuka ku mirasire y'izuba.
Mu Karere ka Musanze Polisi y'u Rwanda yacaniye ingo 181 zo mu Mudugudu wa Mugari mu Kagari ka Mugeshi mu Murenge wa Cyuve. Umudugudu wa Mugari uri mu midugudu itatu yacaniwe na Polisi y'u Rwanda bigahwana n'ingo 381 zahawe urumuri ruturuka ku mirasire y'izuba. Indi midugudu ariyo Ruhehe na Masoro buri umwe hacaniwe ingo 100.
Muri ibi bikorwa bya Polisi y'u Rwanda byo kuri uyu wa Gatandatu hanatewe ibiti by'imigano birenga 500 byatewe mu Karere ka Musanze. Ni igikorwa cyarimo umuyobozi w'Intara y'Amajyaryguru Jean Marie Vianney Gatabazi aho yibukije abaturage ko aribo ubwabo bagomba kugira uruhare mu kurengera ibidukikije.
Yagize ati "Ibi biti duteye hafi y'iki kigo gisuzuma ubuziranenge bw'ibinyabiziga, ndetse n'urumuri ruturuka ku mirasire y'izuba yahawe abatirage, bigamije kurengera ibidukikije. Murasabwa rero kubirinda no kubifata neza."
Mu Karere ka Nyagatare, Umuyobozi w'Intara y'Iburasirazuba Fred Mufulukye yashimiye Polisi y'u Rwanda ku ruhare rwayo ku bijyanye n'umutekano isanzwe igeza ku baturage ikaba igerekaho no kurengera ibidukikije no kuzamura imibereho myiza y'abaturage.
Yagize ati "Gutera ibiti, gucana buji n'agatadowa bigasimbuzwa gucana urumuri ruturuka ku mirasire y'izuba byose biri mu kuzamura imibereho myiza y'abaturage kandi hagashimangirwa ko abaturage batekanye mu buryo bwose. Ibi biti n'amashyamba ni ibyanyu ni mwe mugomba kubirinda. Byangizwa n'abantu muturanye, murasabwa kujya mutanga amakuru igihe hari abagizi ba nabi mubonye babyangiza."
Umuyobozi w'ishami rya Polisi rishinzwe guhuza ibikorwa bya Polisi n'abaturage, Commissioner of Police (CP) Bruce Munyambo yabwiye abaturage ko ibikorwa byo guteza imbere abaturage no kuzamura imibereho yabo bituruka ku miyoborere myiza n'inama z'umukuru w'Igihugu Nyakubahwa Perezida wa Repubulika Paul Kagame.
CP Munyambo yabibukije ko bafite uruhare mu mutekano abasaba kujya batanga amakuru hakiri kare igihe hari uwo babonye yangiza ibidukikije cyangwa akora ibindi byaha.
Kuri uyu wa Gatanu tariki ya 11 Ukuboza Polisi y'u Rwanda yari yateye ibiti 1300 byera imbuto ziribwa mu Mudugudu wa Munini Akagari ka Shango mu Murenge wa Nduba. Ni mugihe tariki ya 10 Ukuboza mu Karere ka Kamonyi hari hatewe ibiti 5000, ingo 217 zo mu Mudugudu wa Subukiniro mu Murenge wa Uwinkingi mu Karere ka Nyamagabe nazo zahawe urumuri ruturuka ku mirasire y'izuba. Kuri uwo munsi mu Karere ka Rubavu Polisi y'u Rwanda yari yahateye ibiti 5600.
Inkuru bijyanye
[AMAFOTO]: Polisi y’u Rwanda iri mu gikorwa cyo kwegereza abaturage ibikorwa by’iterambere no gutera ibiti
