Kinyarwanda
English
Kuri uyu wa Kabiri tariki ya 4 Mutarama Polisi ku bufatanye n'izindi nzego bafashe abantu 78 bari mu masengesho barenze ku mabwiriza yo kurwanya COVID-19. Bafatiwe mu Karere ka Huye, Umurenge wa Tumba, Akagari ka Rango, Umudugudu wa Kabeza.
Abafashwe baturutse mu matorero n'amadini atandukanye yo mu mirenge ya Tumba, Mukura, Gishamvu n'umurenge wa Kansi wo mu Karere ka Gusagara. Bari bayobowe na Nzabonayo Jean w'imyaka 40.
Aba bantu bari bagizwe n'abantu bakuru 67 n'abana bato 11, ubwo berekwaga itangazamakuru bemeye amakosa bakoze yo kurenga ku mabwiriza bavuga ko babitewe n'uko hari ibyifuzo basabaga Imana. Bavuze ko buri muntu yavaga iwe akaza aho hantu barinda baba benshi.
Umuyobozi w'Akarere ka Huye, Ange Sebutege yakanguriye aba bantu kureka inyigisho z'ubuyobe ahubwo bubahirize amabwiriza yo kwirinda COVID-19.
Yagize ati "Imana iba ahantu hose, mwari gusengera mu sengero zujuje ibisabwa cyangwa buri muntu agasengera iwe mu rugo kandi Imana yabumva."
Yakomeje akangurira abantu kwikingiza kuko mu bafashwe harimo abantu 2 batarakingirwa urukingo na rumwe.
Umuvugizi wa Polisi mu Ntara y'Amajyepfo, Superintendent of Police (SP) Theobald Kanamugire yongeye gukangurira abantu kubahiriza amabwiriza ajyanye no kurwanya icyorezo cya COVID-19.
Yagize ati " Duhora tubakangurira kubahiriza amabwiriza yo kurwanya COVID-19, mukirinda kujya ahateraniye abantu benshi, bambare agapfukamunwa neza kandi basengere mu nsengero zujuje ibisabwa cyangwa basengere mu ngo zabo."
Abafashwe bigishijwe bapimwa icyorezo cya COVID-19 nyuma bahanwe hakurikijwe amabwiriza.
