POLISI Y'U RWANDA

Mu mikino y'umunsi wa Kane ihuza amakipe ya Polisi zo mu bihugu bigize umuryango w'abayobozi ba Polisi mu bihugu byo mu karere k'Afurika y'Iburasirazuba (EAPCCO) kuri uyu wa Gatanu tariki ya 24 Werurwe, Polisi y'u Rwanda yegukanye imidali 14 mu mikino itandukanye.

Harimo imidali 9 ya Zahabu,  ibiri ya silver n'itatu ya bronze.

Mu mupira w'amaguru, ikipe ya Polisi y'u Rwanda yegukanye igikombe n'umudali wa Zahabu,  nyuma yo gutsinda ikipe ya Polisi y'u Burundi kuri Penaliti 5 kuri 3.

Ni nyuma y'uko igiteranyo cy'ibitego mu mikino ibiri yahuje aya makipe yombi cyari 3-3, kuko ku mukino wabanje ku wa Kabiri tariki 21 Werurwe,  Polisi y'u Rwanda yari yatsinze iy'u Burundi 3-1, uyu munsi ikipe ya Polisi y'u Burundi iza kugombora yishyura ku bitego 2 ku busa bwa Polisi y'u Rwanda.

Habanje kwitabazwa iminota y'inyongera nayo yaje kurangira amakipe yombi atabashije kwisobanura, nta bundi buryo bwari busigaye uretse gutera za Penaliti, Polisi y'u Rwanda yinjiza penaliti zose uko ari eshanu, u Burundi bwinjiza eshatu, intsinzi yegukanwa na Polisi y'u Rwanda.

Mu mukino w'intoki wa Volleyball naho Polisi y'u Rwanda yegukanye umudali wa Zahabu itsinze ikipe ya Polisi ya Kenya ku maseti 3-1.

Iseti ya mbere Polisi y'u Rwanda yayitsinze ku manota 25-20, iya kabiri kuri 30-28, iya gatatu itsindwa na Kenya ku manota 25-21, Polisi y'u Rwanda iza gutsinda n'iya Kane ku manota 25-19.

Mu bakinnyi bitwaye neza bakegukana ibihembo,  harimo Gatsinzi Venuste wahembwe nk'umwataka mwiza, Nsabimana Mahoro Yvan wahawe igihembo cy'umukinnyi utanga imipira myiza, Sibomana Placide uzwi nka Madson atoranywa nk'uwakoze block neza, Gisubizo Merci yabaye uwatanze imipira neza, mu gihe Rwigema Simon yabaye umukinnyi mwiza mu bwugarizi.

Andrew Wafula wo muri Kenya we yatoranyijwe nk'umukinnyi wakiriye imipira neza kurusha abandi.

Niyonkuru Martha yegukanye umudali wa Zahabu mu gusimbuka umurambararo, aho yahatanaga na Mary Zawadi (Uganda) ndetse na Monica Safania (Kenya).

Mu gusimbuka,  mu bagore u Rwanda rwegukanye imidari itatu irimo, uwa Zahabu wegukanywe na Niyonkuru Martha, uwa silver wegukanywe na Tuyizere Angelique n'uwa Bronze wegukanywe na Ingabire Marie Grace.
 
Mu mukino wa Karate, u Rwanda rwegukanye imidari 5 ya Zahabu mu bakina ari umwe mu bagabo no mu bagore, runawegukana muri karate y'abagabo n'iy'abagore, rwegukana kandi umudali wa Zahabu ndetse n'igikombe nk'igihugu cya mbere.

Mu gusimbuka umurambararo mu bagabo, Tuyishime Pompidou yegukanye umudali wa silver, umunyakenya Isaac Kuselel Kirwa atsindira umudali wa zahabu naho Ruto Kiplagat wo mu gihugu cya Uganda yegukana uwa bronze.

U Rwanda kandi rwegukanye umudali wa bronze mu gusiganwa ku maguru mu bagabo no mu bagore.