Kinyarwanda
English
Kuri uyu wa Mbere tariki ya 4 Ukwakira, Polisi y?u Rwanda ku bufatanye n?Urwego rushinzwe ubugenzacyaha n?izindi nzego beretse itangazamakuru bimwe mu bicuruzwa byafatiwe mu gihugu. Muri ibi bicuruzwa harimo ibitujuje ubuziranenge, ibyarengeje igihe, ibicuruzwa bitemewe ndetse n?ibya magendu. Ibi bicuruzwa byose byafatiwe hirya no hino mu gihugu mu gikorwa ngarukamwaka kizwi ku izina rya Usalama, byafashwe kuva tariki ya 7 Nzeri kugeza tariki ya 1 Ukwakira. Byerekaniwe ku kicaro gikuru cy?Urwego rushinzwe ubugenzacyaha, mu Karere ka Gasabo,Umurenge wa Kimihurura.
Ibi bikorwa bya Usalama bibaye ku nshuro ya Karindwi, ibicuruzwa byafashwe byiganjemo ibinyobwa bitemewe, amavuta yo kwisiga atemewe, ibiribwa by?ibyiganano n?ibitujuje ubuziranenge, imiti yo kwivuza, amasashe, insinga zitujuje ubuziranenge, imyenda n?inkweto bya Caguwa ndetse harimo n?ibiyobyabwenge. Byose hamwe bifite agaciro kangana n?amafaranga y?u Rwanda Miliyoni 38,158,145 (38,465.8USD).
Twagirayezu Jean Marie, umuyobozi mukuru ushinzwe ubugenzacyaha mu rwego rw?Igihugu rushinzwe ubugenzacyaha (RIB) yavuze ko ibikorwa byo gufata biriya bicuruzwa byabereye hirya no hino mu gihugu hagamijwe kurwanya ibikorwa binyuranije n?amategeko ndetse n?ibicuruzwa bitemewe.
Yagize ati? Ibi bikorwa bibaye ku nshuro ya Karindwi hagamijwe kurwanya ibicuruzwa bitemewe bigaragara ku masoko. Ibyafashwe kuri iyi nshuro bifite agaciro kabarirwa muri miliyoni 91 z?amafaranga y?u Rwanda. Byafatanwe abantu 36 kugeza ubu nabo barafunzwe.?
Ikiganiro n'abanyamakuru cyari cyitabiriwe n'inzego zitandukanye harimo Polisi y'Igihugu (RNP), Urwego rw'ubugenzacyaha (RIB), Ikigo gishinzwe ubuziranenge bw'imiti n'ibiribwa (RFTDA) ndetse n'Ikigo gishinzwe ubugenzuzi no kurengera abaguzi (RICA)
Twagirayezu yashimye ubufatanye bwaranze inzego ubwo zari mu bikorwa byo kurwanya biriya bicuruzwa, yasabye abaturage kugira uruhare mu kurwanya ibicuruzwa bitemewe agaragaza ko ari ikibazo kireba buri muntu kuko buri muntu agerwaho n?ingaruka za biriya bicuruzwa.
Ntirenganya Lazare, umuyobozi mu ishami ry?ikigo gishinzwe ubuziranenge bw?imiti n?ibiribwa mu Rwanda yavuze ko ibicuruzwa byafashwe byagaragaweho kuba bitujuje ubuziranenge kubera ingaruka z?uburwayi bitera abantu.
Ati? Mu kigo cy?Igihugu gishinzwe ubuziranenge bw?imiti n?ibiribwa twatanze itangazo tugaragaza bimwe mu biribwa, ibinyobwa, imiti n?ibindi bicuruzwa bigaragara ku masoko kandi bitemewe gucuruzwa. Turashimira Polisi y?u Rwanda, Urwego rushinzwe ubugenzacyaha ndetse n?izindi nzego z?Igihugu zafatanije kugira ngo iki gikorwa cya Usalama kigende neza.?
Ntirenganya yakomeje yibutsa abantu ko imiti igomba gucururizwa ahantu hemewe ikanacuruzwa n?abantu babifitiye ububasha, yasabye abaturage kuba maso bakajya babanza kugenzura ko ibicuruzwa bagiye kugura bitarengeje igihe.
Yakomeje avuga ko ikigo gishinzwe kugenzura ubuziranenge bw?imiti n?ibiribwa kitazahwema gukorana n?izindi nzego mu rwego rwo mu kurinda ubuzima bw?abaturage ndetse ko ubu bugenzuzi buzahoraho.
Umuvugizi wa Polisi y'u Rwanda CP John Bosco Kabera aburira abaturage bakigaragara mu bucuruzi butemewe ko bava ku izima bagashaka indi mirimo bakora.
Umuvugizi wa Polisi y?u Rwanda, Commissioner of Police (CP) John Bosco Kabera yavuze ko ibicuruzwa bitemewe n?ibitujuje ubuziranenge biri mu bihungabanya umutekano.
Ati? Nta kuntu abantu bagira umutekano igihe banywa cyangwa bakarya ibintu bitujuje ubuziranenge n?ibyarengeje igihe by?umwihariko imiti. Biriya bintu bihungabanya umutekano w?abaturage.?
CP Kabera yakomeje aburira abantu bakigaragara mu bucuruzi bw?ibicuruzwa bitemewe abasaba kubicikaho kuko abazajya babifatirwamo bazajya bashyikirizwa ubutabera.
Ati? Ibikorwa byo kurwanya biriya bicuruzwa byabereye hirya no hino mu gihugu. Bisize ubutumwa kuri buri muntu wese utekereza gucuruza bene biriya bicuruzwa, uwabitekerezaga ahite abireka kandi abantu bibuke ko hari irindi jisho binyuze mu mikoranire n?abaturage n?izindi nzego.?
Uwumukiza Beatrice, Umuyobozi mukuru w?ikigo gishinzwe ubugenzuzi no kurengera abaguzi (RICA) yashimye ubufatanye buri hagati y?inzego z?Igihugu mu kurwanya ibi bicuruzwa aho biri hose ku masoko. Yasezeranije ubufatanye mu gutanga amakuru mu rwego rwo kurwanya ibi bicuruzwa.
