Mu marushanwa ngororamubiri Police Athletics yegukanye ibikombe n’imidali

Kuri uyu wa Gatandatu tariki ya 19 Gashyantare 2022 kuri Stade Amahoro habereye amarushanwa ngororamubiri (Athletics). Ni amarushanwa yateguwe n’ishyirahamwe ry’imikino ngororamubiri ryitabirwa n’amakipe 13 harimo n’aya Polisi y’u Rwanda (Police Athletics Clubs). Muri rusange Police Athletics Club niyo yegukanye irushanwa.

Amarushanwa yari agizwe no kwiruka, gusimbuka, kujugunya umuhunda, kujugunya ingasire n'intosho. Muri iyi mikino Police Athletics club yabonye imidari ya zahabu 6, imidari 21 y’ifeza n’imidari 8 y’umuringa, hombi mu byiciro  by’abagabo n’abagore.  Police Athletics Club yakurikiwe na APR Athletic Club yaje kumwanya wa 2 naho ikipe ya Sina  Gerald mu cyiciro cy’abagore iba iya kabiri.

Abakinnyi ba Police Athletics  bitwaye neza bagatsindira imidari ya zahabu ni Inspector of Police (IP) Jean Pierre Cyrille Byiringiro wabonye umudari wa zahabu mugutera umuhunda. PC Nsengiyumva Justin wabonye imidari ibiri ya zahabu mu cyiciro cyo kwiruka muri metero ijana na metero 200, PC Niyonkuru Martha watwaye imidari itatu 3 harimo ibiri ya zahabu n’umwe wa feza.



Abakinnyi ba Police Athletics bagaragaje ibanga bakoresheje kugira ngo babashe kwitwara neza muri aya marushanwa. IP Jean Pierre  Cyrille  Byiringiro yavuze ko ibanga ari imyitozo ihagije kandi n'ubuyobozi bwa Polisi bukabaha ibikenewe mukwitegura.  

Yagize ati: Ibanga nta rindi ,twakoze imyitozo ihagije ,tugendera ku nama z’abatoza nibyo byatumye twitwara neza. Polisi  ntacyo twayiburanye iduha byose bishoboka bidufasha kwitwara neza haba hano mu Rwanda ndetse no hanze yarwo turagerageza.”

Umutoza wa Police Athletics, Inspector of Police (IP),Audace Gasagara yavuze ko gutwara igikombe byari  mu ntego kugira  ngo bashimangire ubuhanga n’ubuhangage bw’ikipe ya Police Athletics.

Yagize ati: Irushanwa riheruka ikipe yacu yari yabaye iya kabiri, ubu sinari kwemera ko twongera kuba aba kabiri ngo mbure igikombe. Byaratubabaje icyo gihe kandi byatumye njye n’abakinnyi mbereye umutoza ndetse n’ubuyobozi bwacu  Polisi y’u Rwanda twitegura neza none tubaye aba mbere.”

IP Gasagara nawe yunze mu ryo abakinnyi bavuze ashimangira ko gutegura abakinnyi aribyo bibahesheje kwitwara neza. Yavuze ko bagiye gukomeza imyitozo kugira ngo abakinnyi barusheho gukoresha igihe gito mu marushanwa.


<-Back To RNP News