Kinyarwanda
English
Mu gitondo cyo kuri uyu wa Gatanu tariki ya 25 Kamena nibwo ba Ofisiye bakuru mu nzego z?umutekano 32 basoje amasomo bari bamazemo umwaka mu ishuri rikuru rya Polisi y?u Rwanda (NPC) riherereye mu Karere ka Musanze. Muri aba ba Ofisiye 32, 25 ni abanyarwanda abandi 7 bagiye baturuka mu bihugu bya Africa nka Sudani y?Epfo, Kenya, Somalia na Namibia.
Ni umuhango wari uyobowe na Minisitiri w'Ubutabera akaba n'intumwa nkuru ya Leta Johnston Busingye, Umuyobozi mukuru wa Polisi y'u Rwanda, IGP Dan Munyuza, Umuyobozi mukuru w'Urwego rw'Igihugu rw'ifungwa n'abagororwa, CG Juvenal Marizamunda, Umuyobozi w'Urwego rw'Igihugu rushinzwe ubugenzacyaha, Col Jeannot Ruhunga, Umuyobozi w'Intara y'Amajyaruguru, Donatilla Nyirarugero, Umuyobozi wungirije wa Kaminuza y'u Rwanda, Prof Dr Alexandre Lyambabaje, Umuyobozi mukuru wungirije muri Polisi y'u Rwanda ushinzwe abakozi n'imiyoborere, DIGP/AP Jeanne Chantal Ujeneza n'abandi bayobozi baje bahagarariye ibihugu byabo muri uyu muhango.
Abasoje amasomo uyu munsi bari ikiciro cya cyenda, bakaba bahakura impamyabumenyi yo ku rwego rwo hejuru mu masomo ajyanye n?imiyoborere azwi nka ?Senior Command and Staff Course?. Banahakura impamyabumenyi y'ikiciro cya gatatu cya Kaminuza mu bijyanye n?amahoro no gukumira amakimbirane.
Mu ijambo ry?umushyitsi mukuru, Minisitiri w?Ubutabera akaba n?intumwa nkuru ya Leta, Johnston Busingye yashimiye abarangije amasomo kubera umurava, imbaraga, gukorana nk'ikipe, n'ubudacogora byabaranze mu gihe cy'umwaka wose bari bamaze biga kandi barigaga mu bihe bigoranye by'icyorezo cya COVID-19 aho bagombaga kubahiriza amabwiriza yose yo kwirinda iki cyorezo. Yavuze ko nubwo banyuze muri ibyo bihe bigoranye ariko bashoboye kubitsinda ariyo mpamvu uyu munsi abantu bari mu birori byo kwishimira imbaraga n'ubudacogora byabaranze.
Min. Busingye Johnston yashimiye abarangije amasomo, anabasaba kuzirikana ko hakiri byinshi byo gukora
Minisitiri Busingye yibukije aba ba Ofisiye bakuru barangije amasomo, kuzirikana ko hakiri byinshi byo gukora, byinshi byo kwiga ndetse na byinshi byo kugeraho. Yabibukije ko amahoro, umutekano, imiyoborere, ubutabera n'iterambere byuzuzanya, abibutsa ko u Rwanda rwigeze kunyura mu bihe bibi ubwo ibyo byombi byatandukanyijwe.
Ati "Mu Rwanda twagize ibihe bya Politiki ishingiye ku moko, imiyoborere mibi, ubusumbane ku mahirwe no ku mitungo, ivangura, ihezwa amakimbirane mu baturage, umuco wo kudahana n'ibindi bikorwa bya kinyamaswa byagejeje u Rwanda ku mahano ya Jenoside yakorewe Abatutsi mu 1994. Ku rundi ruhande twaje kubona ko ubumwe n'ubwiyunge, ubutabera n' imiyoborere myiza byagize uruhare ku mibanire myiza y'abaturage n'amahoro byihutishije iterambere aho ubu u Rwanda ruri mu bihugu byihuta mu bukungu."
Yakomeje agaragaza ko nyuma y'amahano u Rwanda rwanyuzemo rwaje kubona ko umutekano utagomba kuba umwihariko w'abayobozi gusa ko ahubwo imiterere y'ibibazo biriho muri ibi bihe Isi igezemo umutekano ugomba kuba ushingiye cyane ku muturage.
Ati "Niyo mpamvu tugomba kugira abantu bo mu nzego z'umutekano nkamwe bahuguwe cyane,bakora kinyamwuga, bubaha uburenganzira bwa muntu kandi bafite ikinyabupfura. Bakaba ari abantu bafite ubumenyi mu kuyobora kandi bumva neza imihindagurikire y'umutekano mu gihugu, mu Karere no ku Isi yose bigatuma babasha gukemura ibyo bibazo by'umutekano haba mu bihe by'ako kanya cyangwa ibizaza. "
Abanyeshuri 32 nibo barangije amasomo mu ishuri rikuru rya Polisi y'u Rwanda (NPC Musanze)
Yakomeje avuga ko adashidikanya ko urwego rw'amasomo baherewe muri iri shuri rikuru rya Polisi y'u Rwanda ndetse n'ubunararibonye bagiye bungurana hagati yabo ndetse n'ubushobozi bw 'abarimo babigishaga nta kabuza bizabafasha kuzuza neza inshingano zabo kandi bakore ikinyuranyo. Yabasabye kuzakoresha ubumenyi bahawe n'ubwo bari basanganywe mu gukemura ibibazo by'umutekano biri mu bihugu baturukamo.
Minisitiri Busingye yashimiye ubuyobozi bw'ishuri rikuru rya Polisi y'u Rwanda anashimira ubuyobozi bwa Polisi y'u Rwanda ku mpinduka iri shuri rimaze kugeza ku bihugu bya Africa byohereza ba Ofisiye bakuru kuza kurihahamo ubumenyi. Yavuze kuva mu 2012 iri shuri rimaze gutanga impinduka mu mikorere y'inzego z'umutekano nk 'uko bigaragara mu bari mu mirimo itandukanye mu nzego z'umutekano.
Mu ijambo ry'ikaze ry'umuyobozi w'ishuri rikuru rya Polisi y'u Rwanda, Commissioner of Police (CP) Christophe Bizimungu yavuze ko nubwo abanyeshuri bagize ibihe bibi by'icyorezo cya COVID-19 bitababujije kwiga kandi bagatsinda nubwo harimo ababuze abavandimwe babo,abo bashakanye ndetse n'abana babo kubera iki cyorezo. CP Bizimungu yavuze ko abanyeshuri baranzwe n'ikinyabupfura kandi banatsinda neza, avuga ko yishimira uko bitwaye.
Ati "Ndishimira ko iki cyiciro cya 9 cya ba Ofisiye bakuru baranzwe n'ikinyabupfura cyo ku rwego rwo hejuru kandi banatsinda neza. Uko ari 32 bakurikiye amasomo ajyanye n'umwuga, 31 bakurikira amasomo y'ikiciro cya gatatu cya kaminuza mu masomo y'amahoro no gukemura amakimbirane,ikiciro cya gatatu cya kaminuza. Ndishimira ko aya masomo yageze ku ntego zayo. "
CP Christophe Bizimungu Umuyobozi mukuru w'ishuri rya Polisi (NPC Musanze)
Umuyobozi w'ishuri rikuru rya Polisi y'u Rwanda yasabye ba ofisiye bakuru basoje amasomo yabo kuzakomeza kurangwa n'ikinyabupfura mu kazi kabo ndetse no mu buzima busanzwe.
Ati "Mu kazi kacu ikinyabupfura kivuze byinshi, nta kinyabupfura ubumenyi mwaherewe hano ndetse n'ubwo mwakuye ahandi ntacyo byabamarira,ikinyabupfura kandi si mu kazi gusa ahubwo ni ngombwa no mu buzima bwanyu bwa buri munsi. Musubiye mu mirimo yanyu, mwibuke ko mufite inshingano zo gukora neza kandi kinyamwuga. Mwahawe ubumenyi n'ubushobozi, ibi bigomba kubaranga mu myitwarire no mu bikorwa, mufite inshingano zo kugaragaza impinduka aho mukorera."
Umuhango wo guha impamyabumenyi y'ikiciro cya cyenda cya kaminuza ba ofisiye bakuru 32 wayobowe n'umuyobozi mukuru wa kaminuza y'u Rwanda, Prof. Alexandre Lyambabaje. Yabashimiye kuba baragiriye icyizere kaminuza y'u Rwanda bagahitamo kuyikuramo ubumenyi mu bijyanye n'amahoro no gukemura amakimbirane. Yabashimiye kuba uyu munsi bagenze ku ntego zabo anabashimira uko bitwaye mu gihe cy'umwaka bari bamaze biga.
Ati "Gusoza amasomo ni ibintu byiza kandi bishimisha uwabigezeho, umuryango we ndetse n'Igihugu muri rusange. Ahari amakimbirane nta mahoro aba ahari, ndizera ko mwahawe ubumenyi mu gukumira amakimbirane ndetse mukagira akarusho musanganywe mu bijyanye n'umutekano ,ibi bizafasha mu kugera ku mahoro arambye."
Prof. Lyambabaje Alexandre umuyobozi wungirije wa Kaminuza y'u Rwanda
Umunyakenyakazi, Senior Superintendent of Police (SSP) Bianca Ndanu Nzioki na Senior Superintendent of Police (SSP) Innocent Kimenyi ni bamwe mu barangije amasomo muri iki kiciro cya 9. Bavuze ko mu gihe cy'umwaka wose bize ibintu bitandukanye ariko cyane cyane uburyo bw 'imiyoborere, kurwanya ibyaha no gukemura amakimbirane hagamijwe kwimakaza amahoro.
SSP Bianca Ndanu Nzioki yagize ati "Mpungukiye byinshi birimo imikoranire n'izindi nzego ariko cyane cyane uko ibihugu byo ku mugabane wa Africa byahangana n'ibyaha byambukiranya imipaka, gukemura amakimbirane bikatugeza ku iterambere rirambye."
SSP Innocent Kimenyi yagize ati "Twize uburyo bwo kuyobora amashami yo mu nzego z'umutekano, gukorana n'itangazamakuru, kurwanya ibyaha.Mu miyoborere twarebeye hamwe kumenya icyo tugiye gukora, uburyo tugikora no mu gihe tugikoreramo."
Hashize imyaka umunani Ishuri Rikuru rya Polisi riherereye mu Mujyi wa Musanze rifunguwe na Perezida wa Repubulika, Paul Kagame. Ni imyaka yaranzwe n?iterambere ku rwego rugaragara, aho ryabaye ikiraro mu guhugura abanyarwanda n?abanyamahanga bari mu buyobozi bukuru bwa Polisi.
Ahari inyubako z?iri shuri, mu myaka ya 1954 hari ishuri ryigisha ubuvuzi, nyuma y?imyaka itandatu mu 1960 rirahinduka riba ishuri ryitwaga EGENA (Ecole de la Gendarmerie Nationale) kugeza mu 1995.
Mu 2001 nibwo ryaje guhindura izina ryitwa Ishuri rihugura Abapolisi (National Police Academy), ariko bigeze mu 2013 rishyirwa ku rundi rwego rihinduka Ishuri Rikuru rya Polisi (National Police College) ari na bwo ryatangiye gufungurira amarembo n?abo mu bindi bihugu bya Afurika.
Benshi mu bapolisi bakuru b?u Rwanda, abayobora inzego zitandukanye za Polisi y?Igihugu barinyuzemo. Ni cyo kimwe n?abajya mu butumwa bwa Loni bwo kubungabunga amahoro na bo akenshi barinyuramo bagahabwa amasomo yihariye.
Kuri iyi nshuro, rigiye gutanga impamyabushobozi ku cyiciro cya cyenda cy?abiga amasomo yo ku rwego rwo hejuru mu miyoborere azwi nka ?Senior Command and Staff Course?.
