IGP Munyuza yasabye Urubyiruko rw'Abakorerabushake kurangwa n'indagagaciro zo gukunda igihugu

Kuri uyu wa Gatatu tariki ya 8 Kamena, umuyobozi mukuru wa Polisi y’u Rwanda, IGP Dan Munyuza ari kumwe na Guverineri w' Intara y'Amajyaruguru Madamu Dancilla Nyirarugero yasoje ku mugaragaro amahugurwa y’iminsi itandatu yahuzaga urubyiruko rw’abakorerabushake yaberaga mu ishuri rya Polisi y’u Rwanda (PTS Gishari) riherereye mu Karere ka Rwamagana.

Muri aya mahugurwa hahugurwaga urubyiruko rw'abakorerabushake 216 rwaturutse mu Ntara y'Amajyaruguru bahagarariye abandi  ku rwego rw’uturere n’imirenge. Hahuguwe kandi Abakozi b'uturere bashinzwe urubyiruko umuco na Siporo, Abayobozi b'amashami y'imiyoborere myiza, n'abayobozi b'amashami y'ubuzima .

Mu gihe cy’iminsi itandatu uru rubyiruko rumaze rwiga, rwize amasomo atandukanye harimo Kugira uruhare rufatika mu gucyemura ibibazo bibangamiye imibereho myiza y’abaturage, Kwicungira umutekano, Kwimakaza indangagaciro z’umuco nyarwanda na kirazira,Kwihangira imirimo, guhanga udushya no gukorera ku mihigo, Ikoranabuhanga n’itumanaho.

Asoza aya mahugurwa IGP Dan MunyuzaYabashimiye uruhare rwabo mu kurwanya ibyaha. Yibukije urubyiruko rw'abakorerabushake baturuka mu turere twa Musanze, Burera, na Gicumbi dukora ku bihugu duturanye kurwanya ikintu cyose kibi cyakwijira mu gihugu giturutse muri ibyo bihugu.

IGP Munyuza yibukije uru rubyiruko ko ari abavuga rikumvikana igihugu gifite.

Yagize ati: "Muri bato, mufite imbaraga kandi mufite ubwenge kuko mwize, bityo rero inama mwagira abakuru cyangwa abato ndetse n' abayobozi b'igihugu cyacu bazumva kandi bakaziha agaciro."

Yabibukije ko ibyaha byinshi bigaragara mu gihugu usanga bituruka mu bihugu duturanye abasaba kurwanya no gukumira magendu zinjira mu gihugu kuko zangiza ubukungu.

Yabasabye kandi gukumira ibiyobyabwenge kuko usanga byangiza urubyiruko, bigateza ibyaha aho usanga akenshi abakora ibyaha  baba banyoye urumogi cyangwa kanyanga.

IGP Munyuza yashimiye ubuyobozi butegura aya mahugurwa ko uyu ari umwanya mwiza wo kongera gusuzumira hamwe icyahungabanya umutekano w'u Rwanda.

Yagize ati: "Iyo urebye bimwe mu bihugu byo muri Afurika usanga hari urubyiruko rwishora mu mitwe y'intagondwa igamije guhungabanya umutekano w'ibihugu no kwica abaturage, turabasaba kwirinda kumva ibitekerezo by'urwo rubyiruko rwamaze kwangirika mu mutwe ahubwo imbaraga n'ubwenge mufite mubikoreshe murinda umutekano w'igihugu cyacu."

IGP Munyuza yasabye urubyiruko kwirinda kwipfusha ubusa rukirinda gukoresha ibiyobyabwenge.

Ati: "Murasabwa kwirinda kunywa ibiyobyabwenge ahubwo mugakora ibikorwa bituma mwiyubaka, mu kagira indangagaciro zibaranga, mwimakaza gukora neza, murwanya imico mibi, mutanga serivisi nziza, mugatanga amakuru y'ikintu cyose cyateza umutekano muke, mugaharanira kugira indangagaciro zo gukunda igihugu."

Yasoje asaba uru rubyiruko guhangana n'abantu bose bafite gahunda yo guharabika igihugu cyacu cyane cyane ababikorera kuri murandasi,
abakangurira gukoresha igihe neza bakora ibikorwa bibateza imbere ndetse n'igihugu.

Guverineri w'intara y'Amajyaruguru Madamu Dancilla Nyirarugero yashimiye Ubuyobozi bwa Polisi y'u Rwanda rwemeye ko Aya mahugurwa abera mu ishuri rya Polisi rya Gishari, anashima urubyiruko ko rwitwaye neza muri aya mahugurwa bamazemo iminsi 6.

Yagize ati: " Ubuyobozi bwa Polisi bwatanze ibikenerwa byose ngo aya mahugurwa agende neza, turasaba urubyiruko rwahuguwe gufasha Ubuyobozi bwo mu Ntara y'Amajyaruguru kwesa imihigo iyi Ntara yasinye imbere ya Nyakubahwa Perezida wa Repubulika."

Richard Kubana,  Umuyobozi mukuru ufite mu nshingano guhuza ibikorwa by’urubyiruko rw’abakorerabushake muri Ministeri y’Ubutegetsi bw’Igihugu yavuze ko intego z’ibi biganiro zagezweho kandi ko  ashingiye ku myumvire y’urubyiruko  yizeye neza ishyirwa  mu bikorwa ry’imyanzuro  yafatiwe mu mahugurwa.

Yagize ati: ”Mu gutegura iki gikorwa cyo guhugura urubyiruko rw’abakorerabushake bahagarariye abandi byari  bikenewe  kandi byihutirwa. Intego y’aya mahugurwa yagezweho tukaba tuboneyeho no gushimira ubuyobozi bw’Igihugu bwatwoherereje abagombaga kuduhugura.   Imyanzuro igera kuri 17 yafatiwe mu mahugurwa niyo igiye gutangira gushyirwa mu bikorwa, hibandwa cyane kujya gusangiza ubumenyi abo twaje duhagarariye mu Mirenge.”







<-Back To RNP News