Police HC ibaye iya mbere mu itsinda mu majonjora y'igikombe kitiriwe intwari z'u Rwanda

Kuri uyu wa Gatandatu tariki ya 5 Gashyantare nibwo hatangiye amajonjora mu irushanwa ryitiriwe intwari z'Igihugu mu mukino wa Handball.Ikipe ya Polisi y'u Rwanda (Police HC) yasoje amajonjora ari iya mbere. Yari mu itsinda ryakiniye mu Karere ka Gatsibo, Umurenge wa Kiziguro mu ishuri ryisumbuye rya Kiziguro (Kiziguro S.S). Itsinda ryari rigizwe na Police HC,  UR-Gikondo, UR-Remera na  ADEGI-Gituza, Police HC yatsinze aya makipe yose bituma isoza amajonjora ari iya mbere, iya kabiri iba ADEG-Gituza.

Umukino usa nk'uwagoye Police HC ni uwayihuje n'ikipe ya ADEGI-Gituza kuko iyi kipe yagiye yihagararaho ,umukino wose urangira itsinzwe na Police HC ibitego 31 kuri 17.

Mu ikipe ya Police HC hagaragayemo abakinnyi bashya bagera kuri 6, Umutoza wa Police HC,Chief Inspector of Police (CIP) Antoine Ntabanganyimana  yavuze ko Police HC irimo kubakira ku bakinnyi bakiri bato bitewe n'amarushanwa ateganijwe muri uyu mwaka wa 2022 kandi biri no muri gahunda yo kubaka ahazaza ha Police HC.

Yagize ati " Nibyo koko muri Police HC uyu mwaka wa 2022 twazanyemo amaraso mashya ,abakinnyi batandatu harimo batatu b'abapolisi. Ni mu rwego rwo kubaka ikipe kugira ngo aya maraso Madhya aze gufasha abakinnyi basanzwe bari mu ikipe."

Umutoza wa Police HC, CIP Ntabanganyimana yavuze ko ikipe yatangiye kongeramo amaraso mashya

CIP Ntabanganyimana yagarutse ku mazina asanzwe amenyerewe mu ikipe ya Police HC batagaragaye mu ma rushanwa y'amajonjora. Yavuze ko kuva iyi kipe yavana igikombe mu gihugu cya Tanzania hari abakinnyi nka Tuyishime Zacharie, Rwamanywa Viateur na  Umuhire Yves bakuyeyo imvune bakaba bataramera neza cyane. Yavuze ko barimo kugenda bamera neza ndetse ko hari icyizere ko bazakina imikino ya nyuma y'iri rushanwa ry'igikombe cy'intwari.

Umutoza wa Police HC yasezeranije abakunzi ba Police HC n'ubuyobozi bwa Polisi y'u Rwanda ko ikipe yiteguye kwegukana iri rushanwa igatwara igikombe.

Umutoza wa ADEGI-Gituza, Nambajimana Jean Marie Vianney nyuma yo gutsindwa ku mukino wa nyuma w'ijonjora atsinzwe na Police HC ya vuze ko Police HC yamurushije ku buryo bugaragara. Yavuze ko nawe arimo gutegura abakinnyi bakiri bato kugira ngo bibafashe kwitegura amarushanwa ahuza amashuri yisumbuye muri aka Karere k'ibiyaga bigari.

Yagize ati" Nibyo ndashimira Police HC idutsinze iturusha, ubu twebwe turimo kuzamura impano z'abakinnyi bakiri bato bitewe n'amarushanwa twitegura uyu mwaka ya FEASA."

Biteganijwe ko imikino ya nyuma y'iri rushanwa   izaba tariki ya 12 na 13 Gashyantare, azabera mu Mujyi wa Kigali muri UR-Remera no mu kigo cy'urubyiruko cya Kimisagara (Maison des Jeunes). Twabibutsa ko Police HC ariyo iheruka kwegukana iri rushanwa mu mwaka ushize wa 2021.


<-Back To RNP News