Kinyarwanda
English
Abapolisi bagize agashami gashinzwe ubuvuzi mu bapolisi b'u Rwanda bari mu butumwa bw'umuryango w'abibumbye bugamije kubungabunga amahoro mu gihugu cya Sudani y'Epfo batangiye ubukangurambaga mu baturage bakuwe mu byabo n'intambara. Ni ubukangurambaga bugamije kurwanya icyorezo cya COVID-19,bwatangiye kuri uyu wa mbere tariki ya 17 Gicurasi butangirira mu nkambi iri i Juba, umurwa mukuru wa Sudani y'Epfo.
Dr Ndamiye Rugazura Joseph, umuyobozi w'ishami ry'ubuvuzi mu bapolisi b'u Rwanda bari muri Sudani y'Epfo (FPU-3) yagaragarije abari bitabiriye ubukangurambaga uko icyorezo gihagaze muri rusange, ikigitera, uko gikwirakwira, ibimenyetso byacyo n'ingamba zihari zo kukirinda. Mu byo baganirijwe hibanzwe ku kugira isuku yo soko y'ubuzima ndetse ikaba ari nayo igenderwaho mu kwirinda ikwirakwira rya COVID-19. Baneretswe uko bakaraba mu ntoki n'uko bambara agapfukamunwa.
Imibare itangwa n'ishami ry'umuryango w'abibumbye ryita ku buzima (OMS) rigaragaza ko kugeza ubu muri Sudani y'Epfo habarirwa abantu 10,652 bamaze kwandura COVID-19, 10, 462 bamaze kugikira, 115 bamaze kwitaba Imana. Abantu 5,459 nibo bamaze guhabwa inkingo.
OMS kandi ivuga ko ku Isi yose abantu barenga miliyoni 162 bamaze kwandura COVID-19, abarenga miliyoni 3 imaze kubahitana.
Dr Ndamiye yibukije abahugurwaga ko n'ubwo hari inkingo bidakuraho ko umuntu ku giti cye afite inshingano zo kubahiriza amabwiriza yo kwirinda icyorezo ndetse akirinda no kugikwirakwiza. Yabakanguriye kujya birinda ingendo zitari ngombwa bakaguma mu rugo, guhana intera, gukaraba mu ntoki kenshi gashoboka n'amazi meza n'isabune, kwambara agapfukamunwa neza, gusukura ibikoresho bakoraho bakabitera imiti yabugenewe yica udukoko.
Senior Superintendent of Police (SSP) Jeannette Masozera ayoboye itsinda ry'abapolisi(FPU-3) bari i Juba muri Sudani y'Epfo yavuze ko ubu bukangurambaga bugamije gufasha abaturage ba Sudani y'Epfo kwirinda icyorezo cya COVID-19.
Ati "Ubuzima ni kimwe mu bigize umutekano no kurinda amahoro, ubungabunga amahoro mu bantu bafite ubuzima kandi batekanye. Ibi turimo biri mu nshingano zacu zo kubungabunga amahoro kugira ngo abantu basobanukirwe iki cyorezo, bahindure imyitwarire n'imitekerereze bafate ingamba."
Yakomeje asaba abahuguwe gufata iya mbere bakazajya bahugura abandi mu nkambi n'ahandi bazaba bari.
