RNP News

Kuwa mbere, 09 Nzeli, 2019

[AMAFOTO]: Mu marushanwa ya Korea Ambassador’s Cup, ikipe ya Police Taekwondo yegukanye igikombe n’imidali 6 ya Zahabu

Buri mwaka ambasade y’igihugu cya Korea y’Epfo itegura ikanatera inkunga  amarushanwa y’umukino njyarugamba wa Taekwondo, muri iryo rushanwa amakipe yose yo mu Rwanda araryitabira ndetse hakanatumirwa n’ibihugu byo muri aka karere k’Iburasirazuba bwa Afrika.  Muri uyu mwaka wa 2019 iri rushanwa rizwi nka Korea Ambassador’s Cup ryatangiye tariki ya 07 rigeza tariki ya 08 Nzeri, ribera mu mujyi wa Kigali mu karere ka Gasabo mu murenge wa Remera kuri Petit Stade.

Muri uyu mukino wa nyuma wagaragayemo abayobozi batandukanye bari baje kuwukurikira barimo Ambasaderi wa Repubulika ya Korea y’Epfo mu Rwanda Kim Eung-Jong, umuyobozi mukuru wungirije muri Polisi y’u Rwanda ushinzwe imiyoborere n’abakozi DIGP/AP Juvenal Marizamunda, Perezida wa komite y’imikino ngororamubiri mu Rwanda Ambasaderi Valens Munyabagisha ndetse n’abafana benshi.



Abakinnyi bagera kuri 250 baturutse mu Rwanda, Kenya na Repuburika iharanira Demokarasi ya Congo nibo bari bitabiriye iri rushanwa, harimo abakinnyi 15 b’ikipe ya Polisi y’u Rwanda ikina umukino wa Taekwondo, iyi kipe ikaba yarashoboye kubyitwaramo neza kuko yabonye umwanya wa Gatatu igahabwa igikombe ndetse abakinnyi bayo batandatu (6) bambitswe imidali ya Zahabu, umwe yambikwa umudali wa Feza naho undi yambikwa uw’Umulinga. Ikipe ya mbere yabaye iyo mu gihugu cya Kenya yitwa Paradisso, ikurikirwa n’ikipe yo mu Gatenga (Rwanda) yitwa Dream Taekwondo Club.

Iyi midali bayitsindiye biturutse ku biro bya buri mukinnyi n’uwo bari bahanganye, mu bagabo, Kayitare Benoit yatsindiye umudali wa Zahabu mu bakinnyi bafite ibiro biri munsi ya 58, Nzeyimana Savio nawe yatsindiye umudali wa Zahabu mu bantu bafite ibiro biri munsi ya 80, Munyakazi Vincent nawe yatsindiye umudali wa Zahabu mu bakinnyi bari munsi y’ibiro 68 ndetse na Mwemezi Cedric mubari munsi y’ibiro 70.



Ni mu gihe Sekanyambo Jean Paul yatsindiye umudali wa Feza mu bakinnyi bafite ibiro biri munsi ya 63 naho Kwibuka Emmanuel atsindira umudali w’Umulinga mu bakinnyi bakinnye bafite ibiro biri munsi ya 54.

Mu bakobwa, Uwimbabazi Delphine yatsindiye umudali wa Zahabu mu bakinnyi bakinnye bari munsi y’ibiro 49 ndetse na Ndacyayisenga Aline atsindira umudali wa Zahabu mu bakinnyi bakinnye bafite ibiro biri munsi ya 62, uyu akaba ari nawe wegukanye igikombe mu bakobwa bitwaye neza muri iri rushanwa. Muri rusange ikipe ya Police Taekwondo yegukanye umwanya wa Gatatu ihabwa igikombe.

Mu ijambo rya ambasaderi wa Repubulika ya Korea y’Epfo Kim Eung- Jong mu Rwanda,  yashimiye Leta y’u Rwanda uburyo iteza imbere imikino ariko cyane cyane ashimira ubuyobozi bwa Polisi y’u Rwanda uburyo bushyigikira imikino muri rusange ariko  by’umwihariko umukino wa Taekwondo.

Yagize ati “Turashimira leta y’u Rwanda idahwema gushyigikira uyu mukino wa Taekwondo ndetse n’imikino muri rusange, ariko cyane cyane ndashimira ubuyobozi bwa Polisi y’u Rwanda ukuntu bwitabira uyu mukino, umuyobozi mukuru wungirije muri Polisi y’u Rwanda ndetse n’abafana b’ikipe ya Polisi baje kureba uko ikipe yabo yitwara. Ni byiza cyane ndetse nabonye bafite ikipe nziza cyane yitwara neza, turabibashimira bazakomereze aho.”



Ambasaderi Kim Eung-Jong yavuze ko Repubulika ya Korea y’Epfo itazahwema gushyigikira iyi mikino, asezeranya ko aya marushanwa azahoraho.

Perezida wa Komite w’ishyirahamwe ry’imikino ngororamubiri mu Rwanda Ambasaderi Valens Munyabagisha yashimiye Leta ya Korea y’Epfo ndetse n’ubuyobozi bwa Polisi y’u Rwanda mu gushyigikira umukino wa Taekwondo.

Yagize ati “Turashimira leta ya Korea ibinyujije muri ambasade yabo hano mu Rwanda, iyo uteje imbere imikino uba uteje imbere ubuzima ndetse n’uburezi, umuntu ukina agira ubuzima bwiza kandi akajijuka. Turanashimira ubuyobozi bwa Polisi y’u Rwanda ukuntu buteza imbere uyu mukino wa Taekwondo ndetse bakanawushyigikira.”



Umutoza w’ikipe ya Police Taekwondo Alain Irene Bagire yashimiye abakinnyi ayoboye uko bitwaye ndetse ashimira ubuyobozi bwa Polisi y’u Rwanda ndetse n’abafana muri rusange uburyo baje ari benshi gushyigikira ikipe yabo.

Yagize ati“Abakinnyi banjye bitwaye neza ugereranyije n’ibihe bavuyemo by’imikino, twari tumaze icyumweru kimwe gusa tuvuye mu marushanwa ya EAPCCO, abakinnyi baracyananiwe. Ndashimira ubuyobozi bwa Polisi y’u Rwanda buduhora hafi cyane, twishimiye umuyobozi mukuru wungirije wa Polisi, Afande Juvenal Marizamunda yaje kudushyigikira ndetse hari n’abandi bapolisi benshi baje gushyigikira ikipe yabo, turabashimira.”

Aya marushanwa yari yitabiriwe n’abakinnyi bagera kuri 250 baturutse mu makipe y’ibihugu nk’u Rwanda rwakiriye irushanwa rwari rufitemo amakipe 14, Kenya ifitemo amakipe 3 ariko yageze mu Rwanda akora ikipe imwe ndetse n’igihugu cya Repubukika iharanira Demokarasi ya Congo cyari gifite ikipe imwe.  Muri rusange igihugu cya Kenya kikaba aricyo cyabaye icya mbere gikurikirwa n’u Rwanda.


Share Button
Buy Cialis