RNP News

Kuwa gatanu, 27 Nzeli, 2019

[AMAFOTO]: DIGP/AP Marizamunda yakiriye itsinda ryaturutse mu gihugu cya Cote d’Ivoire

Mu gitondo cyo kuri uyu wa Gatanu tariki ya 27 Nzeri, nibwo umuyobozi wa Polisi y’u Rwanda wungirije ushizwe abakozi n’imiyoborere DIGP/AP Juvenal Marizamunda yakiriye itsinda ry’abantu batandatu (6) baturutse  mu nzego zitandukanye zishinzwe imiyoborere myiza no kurwanya ruswa mu gihugu cya Côte d'Ivoire. Yabakiriye ku cyicaro gikuru cya Polisi y’u Rwanda giherereye ku Kacyiru.

Aba bashyitsi bari bayobowe na Dago Desire, umujyanama mu rwego rukuru rushinzwe imiyoborere myiza mu gihugu cya Côte d'ivoire, akaba ari nawe wari uyoboye iri tsinda riri mu rugendo shuri mu bigo bitandukanye bya Leta. Uyu munsi bakaba basuye Polisi y’u Rwanda aho bavuga ko bifuje kuza kuyigiraho ingamba zirambye zafashwe mu rwego rwo gukumira no kurwanya ruswa.

DIGP Marizamunda  aganiriza aba bashyitsi yabagaragarije ko biturutse ku bushake bwa Leta  y’u Rwanda, hafashwe ingamba zo guca no kurandura ruswa burundu. Ibi bikagerwaho binyuze muri politiki y’igihugu yo kutihanganira uwo ariwe wese wakira cyangwa utanga ruswa (zero tolerance policy).



Yavuze ko ingamba zo kurandura ruswa zitareba igice kimwe cyangwa ikindi mu gihugu, ko ahubwo ari mu nzego zose, ndetse no muri Polisi y’u Rwanda ruswa ni ikizira.

Yagize ati: ’’Ingamba Polisi y’u Rwanda yafashe zo kurwanya ruswa zifatiye ku bushake na Politike bya Leta y’u Rwanda. Twashyizeho umutwe wihariye wo kurwanya ruswa haba mu ba Polisi bacu mu mashami bakoreramo yose ndetse no mu bandi bakozi bakora mu bigo bya leta k’uburyo kugeza ubu hamaze gufatwa ndetse hakirukanwa abapolisi benshi baketsweho icyaha cya ruswa.”  

DIGP  Marizamunda yakomeje avuga ko mu ngamba zafashwe mu rwego rwo kurwanya no gukumira ruswa harimo ishyirwaho ry’uburyo bw’ikoranabuhanga mu mitangire ya serivisi za Polisi y’u Rwanda. Ibi ngo bikaba byarakozwe mu rwego rwo kugabanya aho abapolisi bahurira n’abaturage babaha serivise.

Yagize ati: ”Ubu inyinshi muri serivise Polisi y’u Rwanda itanga zitangirwa kuri murandasi hifashishijwe ikoranabuhanga, ibi twabikoze kugira ngo tugabanye uguhura k’umupolisi n’umuturage hato bidatuma hagira utanga ruswa cyangwa uyaka.”

Dago Désiré, umuyobozi w’iri tsinda ryaturutse mu gihugu cya Côte d'Ivoire yavuze ko hari byinshi bigiye ku Rwanda by’umwihariko kuri Polisi y’u Rwanda harimo gushyiraho ishami ryihariye rishizwe kurwanya no gukumira ruswa ndetse na politike  yo kutihanganira ruswa.

Yagize ati: ”Hari ibyo twumvise byiza mu ngamba mwashyizeho mu kurwanya ruswa mu bapolisi banyu nk’uburyo bwo gutanga serivisi mwifashishije ikoranabuhanga, ishami mwashyizeho rirwanya rikanakurikirana abariye cyangwa abaketsweho kurya ruswa ndetse n’ibihano twabonye bikomeye ku bantu bafatiwe mu byaha bya ruswa. Ibi natwe tugiye gusaba leta yacu irebe uko yabyigana.”

Uyu muyobozi n’intumwa ayoboye bagaragaje ko bishimiye imiyoborere myiza basanze mu Rwanda, bavuga ko byose bituruka ku mikorere myiza ya Leta y’u Rwanda ndetse n’ubushake bwa Politiki. Aba  bashyitsi bari mu Rwanda mu ruzinduko rw’akazi aho basura inzego zitandukanye za Leta, uyu munsi bakaba basuye  Polisi y’u Rwanda.


Share Button
Buy Cialis